Viðskipti erlent

Olíuverð lækkar hratt, tunnan fór undir 70 dollara

Heimsmarkaðsverð á olíu heldur áfram að lækka á töluverðum hraða og fór í morgun undir 70 dollara á tunnuna. Verðið stendur nú í rétt rúmum 70 dollurum. Það er einkum ótryggur efnahagur í Evrópu sem veldur þessum lækkunum.

Í frétt um málið á vefsíðunni epn.dk segir að WTI olían á markaðinum í New York hafi lækkað um 2,2% og niður í rétt tæpa 70 dollara á tunnuna. Hinsvegar lækkar Brent olían í London minna eða 1,8% og stendur í 76,5 dollurum. Ekki er nema rúm vika síðan að olíuverðið var í 80 dollurum á tunnuna.

Alþjóðlegir fjárfestar óttast að skuldakreppan í Evrópu muni draga úr vexti á svæðinu og þar með eftirspurn eftir olíu og öðrum hrávörum. Margir þeirra setja nú fé sitt í gull en verðið á því setur met nánast á hverjum degi nú um stundir. Í morgun stóð gullverðið í 1239 dollurum á únsuna.







Mest lesið


Fleiri fréttir

Sjá meira


×

Mest lesið