Vilja kaupa Manchester United

Fjárfestar, sem eru kallaðir Rauðu riddararnir, undirbúa kaup á knattspyrnuliðinu Manchester United. Fundað var um kaupin og fjársöfnun vegna þeirra í gærkvöldi.

Breska blaðið Times fullyrðir að fyrir hópnum fari Jim O´Neill. Hann er deildarstjóri á hagfræðisviði fjárfestingabankans Goldman Sachs en einnig góður vinur Alex Fergusons, knattspyrnustjóra Manchester United.

Markmið Rauðu riddaranna er að nýta sér viðskiptatengsl sín til þess að kalla saman hóp fjárfesta sem gæti safnað einum milljarði sterlingspunda, ríflega 190 milljörðum íslenskra króna, sem talið er að þeir þurfi til þess að kaupa félagið af Glazersfjölskyldunni, sem eru núverandi eigendur. Vonast er til að fjármagnið geti komið frá stuðningsmönnum United sem yrði þá boðin svokölluð gullin hlutabréf í félaginu og gætu haft sitt að segja um stjórnun þess.

Glazerfjölskyldan brást við fréttum af fundi gærkvöldsins með því að gefa út yfirlýsingu um að United væri ekki til sölu. Hins vegar liggur fyrir að rekstur félagsins hefur reynst erfiður. Félagið greiddi rúma 41 milljón sterlingspunda í vexti á síðasta rekstrarári, sem jafngildir tæpum átta milljörðum íslenskra króna. Það þykir Rauðu riddurunum óforsvaranlegt.