Google gefur kínverskum stjórnvöldum fingurinn

23. mars 2010 08:38

Leitarvélin Google hefur ákveðið að hundsa reglur kínverskra stjórnvalda um ritskoðun. Hefur netumferð Kínverja um Google nú verið flutt yfir á netþjónabú í Hong Kong en reglurnar um ritskoðunina ná ekki þangað. Þetta hefur vakið hörð viðbrögð kínverskra stjórnvalda sem að öllum líkindum munu henda Google alfarið út úr landinu.

Í frétt um málið á Bloomberg fréttaveitunni segir að aðgerðir Google hafi magnað deilu sem staðið hafa yfir milli Google og kínverskra stjórnvalda síðustu tvo mánuði. Stjórnvöld segja að Google hafi nú brotið „loforð" sitt um að fylgja ritskoðunarreglunum eftir.

„Google er að spila mikið hættuspil," segir Rob Enderle forstjóri greiningarfyrirtækisins Enderle Group. „Á endanum gætu þeir valdið meiri skaða en ekki."

Netmarkaðurinn í Kína er sá stærsti í heimi en alls eru um 384 milljón notenda tengdir honum. Starfslið Google í Kína telur um 600 manns og getur ekki útilokað að fjöldi þeirra missi vinnuna í kjölfar hinnar nýju stöðu í málinu að sögn talsmanns Google.

Ritskoðunin í Kína gengur út á að netmiðlar þar í landi mega ekki tengja notendur við ákveðna síður eða upplýsingar um ýmis samtök eða atburði eins og t.d. Falun Gong eða atburðina sem gerðust á Tiananmen torginu árið 1989.