Wall Street íhugar að sniðganga skattahækkanir

Óttinn við að skattar hækki hjá hátekjufólki í Bandaríkjunum á næsta ári hefur leitt til þess að stór fjármálafyrirtæki á Wall Street eru að íhuga að borga bónusa fyrir árið í ár strax fyrir áramótin. Venjan er að þessir bónusar eru greiddir út eftir áramótin.

Fjallað er um málið í New York Times. Á tímum Bush stjórnarinnar voru skattar á hátekjufólk lækkaðir umtalsvert. Bandaríkjaþing er nú að ákveða hvort afnema eigi þessar skattalækkanir eða ekki.

Fari svo að þingið ákveði að afnema skattalækkanirnar í stað þess að framlengja þær getur verið um verulegar fjárhæðir að ræða hjá starfsmönnum stærstu bankanna og fjármálafyrirtækjanna á Wall Street.

Meðalbónus hjá hverjum starfsmanna þessara fyrirtækja er um ein milljón dollara eða um 115 milljónir kr. á ári. Ef skattalækkanirnar verða afnumdar þýðir það hátt í 50.000 dollara eða um 5,7 milljónir kr. fyrir hvern þessara starfsmanna í aukna skatta á næsta ári.

New York Times segir að í augnablikinu bíði allir eftir því hvað Goldman Sachs muni gera í málinu. Sá bankinn hefur oft leitt restina af hjörðinni í ákvörðunum sem þessum.