Hörður: Ætlum að klára tímabilið með stæl

„Við spiluðum virkilega vel í kvöld og áttum sigurinn skilið," sagði Hörður Sveinsson, leikmaður Keflvíkinga, eftir sigurinn á Valsmönnum í kvöld.

Keflvíkingar unnu Valsmenn 3-1 í kvöld en leikurinn fór fram á Sparisjóðsvellinum í Keflavík.

„Þetta hefur ekki verið að ganga upp hjá okkur upp á síðkastið en loksins kom það í kvöld. Við spiluðum mjög vel og hefðum jafnvel getað skorað fleiri mörk," sagði Hörður.

Hörður átti stórleik og skoraði tvö mörk fyrir Keflvíkinga og lagði grunninn að sigri liðsins.„Ég er að sjálfsögðu ánægður með þessi mörk hjá mér, en það sem skiptir mestu máli er að við unnum loksins leik. Við höfum ekki skorað svona mörg mörk í langan tíma."

Keflvíkingar skoruðu síðast meira en þrjú mörk í leik gegn Eyjamönnum 26. september árið 2009 en þá sigruðu þeir 6-1.

„Við leggjum mikið upp úr því að klára tímabilið með stæl og fara í frí með kassann upp í loftið. Næsti leikur er við FH-inga og við ætlum okkur að mæta dýrvitlausir í þann leik," sagði markaskorarinn Hörður Sveinsson eftir leikinn í kvöld.