„Þú færð nú bara hjartaslag ef þú kemur heim“

Björgólfur Guðmundsson, þáverandi stjórnarformaður Landsbankans, var staddur erlendis í lok september 2008, einungis fáeinum dögum áður en Landsbankinn var þjóðnýttur.

Þegar að hann fékk fréttir af því hvers kyns ósköp dundu á íslenska bankakerfinu var hann um leið beðinn um að vera ekkert að koma heim. Hann gæti fengið fyrir hjartað. Þetta kemur fram í vitnisburði hans til Rannsóknarnefndar Alþingis.

„Og ég fer þessa ferð, [í lok september 2008] náttúrlega óraði ekkert fyrir hvað var að ske, og við förum þarna út og síðan bara fæ ég hringingar og svona og það er þá ákveðið, og Björgólfur kemur heim og það er nú hringt í hann, Sigurður Einarsson og fleiri hringja í hann og biðja hann um að koma. Og þá er bara ákveðið [.....] að vera ekki að blanda fleirum inn í málið, reyna bara, þetta sé: Vert þú bara kjurr úti, þú færð nú bara hjartaslag ef þú kemur heim, vert þú bara kyrr úti," segir í vitnisburði Björgólfs Guðmundssonar fyrir rannsóknarnefnd Alþingis.