Tuttugu rauðhærð börn í Berndsen-myndbandi

Berndsen heldur áfram að senda frá sér flott myndbönd. Í því nýjasta verður ekki þverfótað fyrir rauðhærðu fólki.

Tónlistarmaðurinn Davíð Berndsen sendi frá sér nýtt myndband á dögunum við lag sitt Young Boy. Myndbandið á sér stað í heimi þar sem allir eru rauðhærðir og flug­syndir og fer Davíð með hlutverk sundhetju sem er dáð og dýrkuð. Á meðal þeirra rauðhærðu leynist þó einn ljóshærður drengur sem að auki er ósyndur og vatnshræddur og því hálf utangátta. Leikstjóri myndbandsins er Helgi Jóhannsson, sá sami og leikstýrði myndbandinu við lagið Supertime.

Viðamikil leit fór fram að rauðhærðu fólki til að taka þátt í verkefninu, en tæplega tuttugu rauðhærð börn leika í myndbandinu auk Davíðs sjálfs.

„Það var mjög absúrd að vera í þessum stóra hópi rauðhærðra og það ríkti mikil samkennd á meðal okkar á tökustað. Ætli þetta verði ekki í eina skiptið sem ég upplifi annað eins á lífsleiðinni. Við höfum fengið mjög jákvæð viðbrögð frá fólki og margir hafa komið til mín og lýst yfir stuðningi við rauðhærða, en við höfum oft þurft að sæta aðkasti vegna háralitarins," segir Davíð.

Hugmyndina að myndbandinu vann hann í samstarfi við leikstjórann og segir Davíð að hún hafi þróast út frá gömlum draumi um að ganga á vatni líkt og hann gerir í myndbandinu. Hann segir vatnsgönguna hafa verið erfiðari en hann hafði gert sér í hugarlund en segist ánægður með útkomuna. Þrátt fyrir að leika sundhetju í myndbandinu viðurkennir Davíð að hann sé heldur slakur sundmaður sjálfur.

„Ég er hræðilegur sundmaður, kann bara bringusund og smá baksund. En það er aukaatriði þegar maður getur gengið á vatni," segir hann og hlær.

Aðspurður segist hann hafa mjög gaman af því að gera tónlistarmyndbönd og er þegar farinn að huga að fjórða myndbandinu.

„Ég hef ótrúlega gaman af þessu. Þetta er eiginlega jafn gaman og að gera tónlistina sjálfa auk þess sem þetta er góð leið til að vekja athygli fólks á hljómsveitinni," segir hann að lokum.