Katy og Russell með alveg eins tattú

Skötuhjúin Russell Brand og Katy Perry hafa nú fengið sér alveg eins húðflúr. Skemmtikrafturinn og tónlistarkonan munu ganga í það heilaga í haust og búist er við stjörnumprýddum gestalista. Setningin „Gakktu meðfram straumnum" á hinu helga indverska tungumáli sanskrít, prýðir nú handleggi beggja. Russell Brand sást fyrst skarta húðflúrinu á forsíðu síðasta tölublaðs Rolling Stones og svo var Perry mynduð með alveg eins tattú nú í vikunni.

Brand og Perry trúlofuðu sig einmitt á Indlandi eftir aðeins þriggja mánaða samband og eru víst bæði mjög spennt fyrir brúðkaupinu. Það verður líklega öllu tjaldað til og mikið um dýrðir en Russell Brand er víst búinn að afþakka allar brúðargjafir og segir að þau skötuhjúin þurfi ekki á neinu að halda enda bæði í góðu starfi.

Annars geta skötuhjúin ekki kvartað yfir því að hafa lítið að gera. Russell fer með aðalhlutverkið í kvikmyndinni Get Him to the Greek sem var nýlega frumsýnd. Katy er á fullu í tónlistarbransanum og sendi nýlega frá sér myndband við lagið California Girls. Myndbandið hefur vakið mikla athygli, en það þykir afar ögrandi.