Umfjöllun: Fram í undanúrslitin eftir að hafa yfirspilað Val

Framarar tryggðu sér sæti í undanúrslitum með 3-1 sigri á Val í átta liða úrslitum VISA-bikars karla í kvöld. Fram komst þar með í undanúrslitin annað árið í röð.

Framarar gerðu út um leikinn með hreint mögnuðum átta mínútna kafla í byrjun seinni hálfleiks þegar þeir skoruðu þrívegis. Þeir hreinlega yfirspiluðu Valsmenn sem virtust alls ekki tilbúnir í leikinn á ný eftir hálfleikinn.

Það er enginn vafi á því að Framarar áttu fullkomlega skilið að komast áfram. Þeir voru betri aðilinn allan leikinn. Það var þó ekki margt markvert sem gerðist í fyrri hálfleiknum og staðan markalaus að honum loknum.

Framarar höfðu svo tögl og haldir í upphafi seinni hálfleiks. Halldór Hermann Jónsson braut ísinn með laglegu skoti. Josep Tillen lagði síðan upp mark fyrir Tómas Leifsson áður en hann skoraði svo þriðja markið sjálfur.

Rúnar Már Sigurjónsson náði að minnka muninn fyrir Valsmenn sem fundu aldrei taktinn í leiknum og voru aldrei líklegir til að búa til spennu eftir að hafa fengið mörkin þrjú í andlitið.

Bæði þessi Reykjavíkurlið hafa ekki verið að spila neitt sérlega vel í síðustu leikjum sínum. Valsmenn héldu uppteknum hætti í kvöld en Framarar voru hinsvegar tilbúnir að rífa sig upp úr lægðinni. Valsmenn náðu lítið að pressa í leiknum og vörn þeirra var óörugg. Eins og svo oft áður var það gríðarlega sterk liðsheild Fram sem var lykillinn að sigri þeirra.

Ef það á að taka einhverja upp úr þá var Josep Tillen magnaður í leiknum, Halldór Hermann Jónsson að vanda gríðarlega mikilvægur á miðjunni og þá ber að hrósa þeim Jóni Orra Ólafssyni og Hlyni Atla Magnússyni sem voru í hjarta varnarinnar í fjarveru Jóns Guðna Fjólusonar og Kristjáns Haukssonar. Þeir áttu báðir flottan leik.

Framarar eru komnir skrefinu nær bikarúrslitunum.

Fram - Valur 3-1

1-0 Halldór Hermann Jónsson (50.)

2-0 Tómas Leifsson (55.)

3-0 Joe Tillen (58.)

3-1 Rúnar Már Sigurjónsson (66.)

Byrjunarlið Fram:

Hannes Þór Halldórsson

Daði Guðmundsson

Jón Orri Ólafsson

Hlynur Atli Magnússon

Sam Tillen

Jón Gunnar Eysteinsson

Halldór Hermann Jónsson

Almarr Ormarsson

Josep Tillen

Tómas Leifsson

Hjálmar Þórarinsson

Byrjunarlið Vals:

Kjartan Sturluson

Stefán Jóhann Eggertsson

Reynir Leósson

Atli Sveinn Þórarinsson

Martin Pedersen

Sigurbjörn Hreiðarsson

Ian Jeffs

Haukur Páll Sigurðsson

Rúnar Már Sigurjónsson

Viktor Unnar Illugason

Danni Köni

Dómari: Þóroddur Hjaltalín Jr., stóð sig verulega vel.