Forseti Internazionale ekki viss um Rafael Benitez

Massimo Moratti, forseti Evrópumeistarana í Internazionale, er ekki viss um hvort að hann vilji ráða Rafael Benitez sem eftirmann Jose Mourinho.

Massimo Moratti segir að félagið muni ákveða það á næstu viku hvort þeir tala við Spánverjann en Moratti var í viðtali um málið hjá ítalska blaðinu Corriere dello Sport.

„Við eigum eftir að sjá betur fyrir okkur hvort að það sé rétta stefnan fyrir félagið að ráða hann. Við ákveðum okkur á næstu dögum," sagði Moratti.

Rafael Benitez hætti sem stjóri Liverpool á fimmtudaginn og fékk rúmlega 3 milljónir punda í starfslokasamning við félagið eftir sex ára starf á Anfield.

Moratti ætlar að vanda valið á næsta þjálfara Internazionale enda ekki fyrir hvern sem er að taka við af Jose Mourinho.