Ranieri orðaður við ítalska landsliðið

Claudio Ranieri, þjálfari Roma, er talinn koma sterklega til greina sem næsti landsliðsþjálfari Ítalíu. Núverandi landsliðsþjálfari, Marcello Lippi, mun að öllum líkindum hætta með liðið eftir HM.

Framkvæmdastjóri Roma, Daniele Prade, hefur þó enga trú á því að hann muni missa þjálfarann sinn í sumar.

„Af hverju ætti hann að vera að ræða við ítalska knattspyrnusambandið? Ég held að hann hafi engan áhuga á því að yfirgefa Roma til þess að taka við ítalska landsliðinu. Landsliðið hans er Roma," sagði Prade.

„Hann vill vinna eitthvað með okkur og er ánægður í herbúðum félagsins. Ég vona að hann verði hér sem lengst."