Inter íhugar að rifta samningi við Adriano

Massimo Moratti, forseti Inter Milan, segist vera að íhuga að rifta samningi við brasilíska vandræðagemlinginn Adriano eftir ítrekuð agabrot hans.

Adriano er nú í heimalandi sínu og hefur lýst því yfir að hann ætli að taka sér hvíld frá boltanum, en þessi yfirlýsing fór eðlilega öfug ofan í forráðamenn ítalska félagsins.

Adriano hefur átt erfitt uppdráttar vegna þunglyndis og áfengissýki og hann lýsti því yfir í síðustu viku að hann hefði misst allan áhuga á að spila. Hinn 27 ára gamli framherji á eitt ár eftir af samningi sínum við Inter.

"Það kemur til greina að rifta samningnum hans. Við höfum gert allt sem við getum en leikmaðurinn getur ekki lofað okkur að standa við sína hlið á samningnum," sagði Moratti.

Því hefur verið fleygt að Adriano gæti hugsanlega gengið í raðir erkifjendanna í AC Milan ef hann fer frá Inter og forsetinn setur sig ekki gegn þeirri hugmynd.

"Við getum ekki haldið neinum hérna gegn vilja sínum," sagði Moratti.