David Sullivan vill fá helming West Ham gefins

Þetta kemur fram í frétt breska blaðsins The Sun um áhuga Sullivan sem er fyrrum eigandi Birmingham liðsins. Sullivan vill töluvert leggja á sig til að bjarga West Ham enda hélt hann með liðinu þegar hann var að alast upp. Hann er hinsvegar ekki tilbúinn að leggja mikið fé út fyrir félagið sem er að drukkna undan 120 milljón punda skuldum að því er segir í The Sun.

Sullivan hefur sagt Straumi að hann sé tilbúinn til að fjárfesta fyrir 40 milljónir punda eða rúmlega 8 milljarða kr. í West Ham til að endurbyggja liðið svo framarlega sem Straumur komi sér frá félaginu og láti honum eftir stjórnina.

The Sun hefur eftir heimildarmanni sínum að Sullivan hafi sagt Straumi..."ég mun snúa við þróuninni hjá félaginu. Ég mun láta það skila hagnaði en aðeins ef þið gefið mér 50% af félaginu nú þegar og látið mig svo um að stjórna því."

Hvað 40 milljón pundin varðar vill Sullivan ekki að neitt af þeirri upphæð verði notuð til að grynnka á slæmum skuldum West Ham. Það fylgir jafnframt sögunni að Sullivan sé ekki til umræðu um breytingar á tilboði sínu og muni leita annað ef því verður ekki tekið.