Sneijder bjargaði öllum stigunum fyrir Mourinho

Hollendingurinn Wesley Sneijder skoraði sigurmark Inter Milan í uppbótartíma þegar liðið vann 2-1 sigur á sjóðheitu liði Udinese í ítölsku deildinni í kvöld. Markið kom Inter í toppsæti deildarinnar.

Dejan Stankovic kom Inter yfir um miðjan fyrri hálfleik eftir sendingu frá Samuel Eto'o en markahæsti leikmaður deildarinnar, Antonio Di Natale, náði að jafna leikinn skömmu síðar.

Sigurmark Wesley Sneijder var hans fyrsta mark fyrir Inter síðan að hann kom til liðsins frá Real Madrid í haust. Markið kom þegar tvær mínútur voru liðnar af uppbótartíma.

Sampdoria getur aftur komist í toppsætið takist liðinu að vinna Parma á heimavelli á morgun.