Milljarðamæringar Forbes: Napurt ár hjá Björgólfi Thor - myndir

Enginn Björgólfur Guðmundsson er á lista Forbes tímaritsins yfir ríkustu einstaklinga veraldar. Forbes tekur saman lista yfir þá sem eru metnir á að minnsta kosti einn milljarð bandaríkjadala. Talið er að tvö þúsund milljarðar hafi horfið úr vösum þessa hóps sem telur nú 793 einstaklinga.

Í fyrra var Björgólfur Thor Björgólfsson metinn á 3,5 milljarða og sat þá í 307. sæti listans, árið áður hafði hann verið í 249. sæti. Nú er Björgólfur metinn á sléttan milljarð og situr í 701. sæti listans með ekki ómerkari mönnum en rússneska auðjöfrinum Boris Berezovsky.

Í umsögn um Björgólf Thor segir að eini milljarðamæringur Íslands hafi átt nokkuð napurt ár. Meðal annars hafi ríkisstjórnin þjóðnýtt Landsbankann þar sem þeir feðgar hafi verið stærstu hluthafar og því tapað öllu. „Það nægði til þess að þurrka út auð föður Thor´s, sem var einnig stjórnarformaður bankans. Sem betur fer á Thor þó aðrar eignir utan Íslands."

Síðan er talað um sölu Björgólfs Thors á hlut sínum í finnska símafyrirtækinu Elisa fyrir 330 milljónir dollara. Einnig er talað um orðróm þess efnis að hann sé að selja verðmætustu eign sína, Actavis, sem hann keypti í júlí árið 2007.

Björgólfur Guðmundsson sat í 1014. sæti listans í fyrra og var þá metinn á 1,1 milljarð. Árið áður var hann í 799. sæti og var metinn á 1,2 milljarð bandaríkjadala.

Náði efsta sætinu aftur

Á toppi listans trónir Microsoft-kóngurinn Bill Gates sem metinn er á 40 milljarða dollara. Hann nær því aftur efsta sætinu af Warren Buffet sem nú er metinn á 37 milljarða. Í þriðja sætinu er svo mexíkaninn Carlos Slim sem metinn er á 37 milljarða dollara.

Þessir þrír eru reyndar í algjörum sérflokki en þeir eru allir á hinum vafasama lista yfir þá sem mest töpuðu á árinu. Á toppi þess lista trónir reyndar Anil Ambani nokkur sem talinn er hafa tapað 31,9 milljörðum dollara og er nú metinn á 10,1 milljarð. Hann er reyndar sá einstaklingur sem mest græddi í fyrra. Warren Buffet er talinn hafa tapað 25 milljörðum eins og Carlos Slim en Bill Gates er „aðeins" talinn hafa tapað 18 milljörðum bandaríkjadollara.

Rússarnir fara

Aðra á lista má nefna stofnanda Apple Steven Jobs sem situr í 178. sæti með 3,4 milljarða. Ralph Lauren er í 224. sæti með 2,8 milljarða, Richard Branson er metinn á 2,5 milljarða og situr í 261. sæti. Þá er sjónvarpsmógúllinn Ted Turner í 376. sæti með 1,9 milljarð. Hinn skeleggi Donald Trump er í 450. sæti með 1,6 milljarð bandaríkjadollara.

Athyglisvert er að skoða rússana á listanum. Í fyrra voru flestir milljarðamæringarnir frá Rússlandi eða 74 talsins. Nú eru þeir aðeins 32 og þeirra þekktastur er líklega Roman Abramovich eigandi kanttspyrnuliðsins Chelsea. Hann situr í 51. sæti listans metinn á 8,5 milljarða. Árið hefur því ekki verið sérstakt hjá Abramovich sem var metinn á 23,5 milljarða í fyrra.