Beckham fékk að heyra það gegn AC Milan

Hópur stuðningsmanna bandaríska liðsins LA Galaxy púuðu á fyrirliða sinn, David Beckham, þegar liðið lék æfingaleik gegn AC Milan í gær. 27 þúsund manns voru á leiknum en Beckham lagði upp bæði mörk Galaxy í 2-2 jafntefli.

Baulað var af krafti þegar Beckham var með boltann og þá héldu margir uppi borðum með áletrunum og skilaboðum til leikmannsins. Beckham er álitinn svikari af mörgum stuðningsmönnum Galaxy eftir að hafa lýst því yfir að hann vilji yfirgefa liðið.

Beckham var lánaður til AC Milan síðasta vetur og vill hann hafa sama háttinn á þann næsta til að auka möguleika sinn á að spila með Englandi á heimsmeistaramótinu á næsta ári.

Beckham leyndi ekki reiði sinni þegar hann gekk af velli í gær og þurftu öryggisverðir að skerast í leikinn þegar hann labbaði framhjá því svæði þar sem háværustu stuðningsmennirnir sátu.

Þess má geta að Thiago Silva og Filippo Inzaghi skoruðu mörk AC Milan í þessum leik í gær.