Greenspan segir enn hættur í hagkerfinu

Alan Greenspan, fyrrverandi seðlabankastjóri í Bandaríkjunum, segir að alheimskreppan sé ekki komin á enda og að stærstu bankar í Bandaríkjunum verði að safna miklu fé áður en að efnahagsbatinn getur byrjað. Greenspan segir jafnframt að jafnvægi þurfi að komast á húsnæðismarkaðinn.

Vikum saman hafa hátt settir embættismenn í ríkisstjórn Obama, þar á meðal Obama sjálfur, haldið því fram að hagkerfið í Bandaríkjunum væri á réttri leið. Breska blaðið Telegraph segir að nýjustu tölur úr seðlabankanum í Bandaríkjunum styðji hins vegar ekki þá skoðun því að samkvæmt þeirra spá mun hagkerfið dragast saman um 2% á þessu ári en ekki 1,3% eins og áður var spáð. Greenspan virðist því líta málin sömu augum og fyrrverandi samstarfsmenn hans í bankanum.

Greenspan telur að húsnæðisverð sé enn of hátt og að fjárþörf helstu viðskiptabankanna í Bandaríkjunum sé enn mjög mikil. Vinna þurfi bug á þessum vandamálum.