Íranir vilja minni olíu

Olíumálaráðherra Írans lagði til á fundi OPEC, samtaka olíuframleiðsluríkja, að olíuríkin dragi enn frekar úr framleiðslu sinni.

,,Það er alltof mikil olía á markaðnum," sagði Gholam Hossein Nozari, olíumálaráðherra Írans, við blaðmenn í Vín í Austurríki þar sem fundurinn fer fram.

Fulltrúar annarra ríkja hafa einnig sagt að samtökin þurfi að draga úr framleiðslu.

Heimsmarkaðsverð á olíu var í mikilli uppsveiflu á mörkuðum í vikunni. Þannig hækkaði bandaríska léttolían um 11% yfir fimmtudaginn og endaði í tæpum 47 dollurum á tunnuna. Hækkunin á Norðursjávarolíunni var rúmlega 8% á sama tíma og endaði tunnan af henni í tæpum 45 dollurum.