Yfir 200.000 Danir eru nú á vanskilaskrá

Yfir 200.000 Danir eru nú á vanskilaskrá (RKI) í landinu og hafa þeir ekki verið fleiri frá árinu 2006. Stöðugt bætist í þennan hóp að því er segir í frétt um málið í Politiken.

Hinn dæmigerði skuldsetti Dani er á aldrinum 21 til 30 ára og býr á Sjálandi að því er kemur fram í nýjum tölum sem RKI hefur tekið saman. Samkvæmt þeim eru sjö af hverjum hundrað Dönum, sem eiga í vanskilum með skuldir sínar, á tvítugsaldrinum en sex af hverjum hundrað eru á þrítugs- og fertugsaldrinum.

Fram kemur að tíu af hverjum hundrað Dönum á vanskilaskrá eiga heima á Sjálandi, fyrir utan Kaupmannahöfn. Hlutfallslega fæstir eru hinsvegar frá Norður-Sjálandi, Fanö og Læsö.

Meðalskuldir þeirra sem eru í vanskilum nema 42.000 dönskum kr. eða rúmlegra milljón kr. Það er svo elsti hópurinn, á aldrinum 61 til 70 ára sem er með mestu skuldirnar eða að meðaltali 57.500 danskar kr. Heildarskuldir fyrrgreindra 200.000 Dana nema 8,5 milljörðum danskra kr. eða um 210 milljörðum kr.