Fjögur efstu liðin fóru öll í undanúrslitin

Fjögur efstu lið deildarkeppni Iceland Express deildar karla tryggðu sér öll sæti í undanúrslitum úrslitakeppninnar en þetta vare ljóst þegar Snæfell vann æsispennandi leik á móti Stjörnunni í gær.

Þetta er aðeins í þriðja sinn frá árinu 2001 sem engin "óvænt" úrslit verða í átta liða úrslitunum en frá þeim tíma hafa sjö lið með heimavallarrétt í fyrstu umferð verið slegin út.Öll fjögur efstu liðin komust einnig áfram 2004 og 2006.

Í fyrra duttu tvö lið með heimavallarrétt út úr átta liða úrslitunum en það voru KR (2. sæti) og Njarðvík (4. sæti). Árið á undan var það Skallagrímur (4. sæti) sem datt úr keppni.

Undanúrslitin hefst á sunnudaginn með fyrsta leik KR og Keflavík og daginn eftir hefst einvígi Grindavíkur og Snæfells í Röstinni í Grindavík.