Opel hugsanlega í kanadíska eigu

Útlit er fyrir að kanadískur varahlutaframleiðandi sé að kaupa Opel bílaverksmiðjurnar í Þýskalandi og þar með Evrópuarm bandaríska bílaframleiðandans General Motors. Ekki er þó fullvíst að kaupin gangi í gegn því þau velta á brúarláni þýska ríkisins sem tryggja á áframhaldandi rekstur.

Allt útlit er fyrir að General Motors vestanhafs fari í gjaldþrot eftir helgi og myndi sala á Evrópuarmi fyrirtækisins, það er Opel í Þýskalandi og Vauxhall í Bretlandi, bjarga rekstri hans frá kröfuhöfum í Bandaríkjunum.

Samkvæmt heimildum þýskra miðla og Reuters fréttastofunnar hefur kanadíska bílavarahlutaframleiðandinn Magna International gengið í meginatriðum frá samkomulagi um kaup á rekstrinum.

Fiat hætti við tilboð í fyrirtækið og segja fulltrúar ítalska bílaframleiðandans að illa hafi gengið að semja við Þjóðverja en kaupin velta á að þýska ríkið samþykki að veita tryggingu fyrir brúarláni upp á vel á annan milljarð evra svo halda megi daglegum rekstri Opel áfram.

Angela Merkel, kanslari Þýskalands, ræddi í dag næstu skref við fulltrúa sveitastjórna í Bochum, Eisenach og Rüsselheim þar sem tuttugu og fimm þúsund manns vinna í verksmiðjum Opel.

Á meðan funduðu fulltrúar Evrópusambandsins en Belgar og Svíar óttast að Þjóðverjar séu aðeins að gæta eigin hagsmuna og að nýr samningur þýði að verksmiðjum utan Þýskalands verði lokað en General Motors er með starfsemi og ríflega tuttugu og tvö þúsund starfsmenn í Belgíu, Bretlandi, Póllandi, Rússlandi, á Spáni og í Svíþjóð.