Eyrir Invest hagnaðist um 1,5 milljarða í fyrra

Eyrir Invest hagnaðist um 1,5 milljarða króna á síðasta ári samanborið við 769,7 milljónir króna í hitteðfyrra. Fjárfestingafélagið, sem er kjölfestufjárfestir Marel Food Systems og næststærsti hluthafi stoðtækjafyrirtækisins Össurar, hefur gripið til viðamikilla aðgerða gegn erfiðum aðstæðum á mörkuðum og meðal annars samið um framlengingu lána fram til 2011.

Tekjur fjárfestingafélagsins námu 25 milljónum króna í fyrra samanborið við 1,2 milljarða árið á undan. Fyrir tekjuskatt er hins vegar tap upp á 240 milljónir króna en jákvæð skattafærsla upp á rúma 1,7 milljarða.

Eigið fé nam tæpum 31,4 milljörðum króna í lok árs en það var 18,1 milljarðar árið á undan. Eiginfjárhlutfall nemur 40,8 prósentum. Laust fé og aðrar bankainnistæðum nema rúmum 6,9 milljörðum króna.

Tekið er fram í uppgjöri félagsins að Eyrir gerir bókhald sitt upp í evrum frá áramótum. Miðað við það námu heildareignir 452 milljónum evra og eigið fé 184 milljónum evra.

Haft er eftir Árna Oddi Þórðarsyni, forstjóra, í tilkynningu, að félagið sé sátt við að skila lítils háttar hagnaði við afar erfiðar aðstæður. „Við höfum skilað góðri ávöxtun í fortíð og höfum þolinmæði og styrk til að takast á við núverandi aðstæður á heimsmörkuðum. Samkeppnisstaða félaga okkar er firnasterk og þau eru í lykilaðstöðu til að skapa veruleg verðmæti þegar hjól atvinnulífsins fara að snúast á nýjan leik. Víða má nú sjá fyrstu merki þess að hið versta sé að baki og heimsviðskipti að taka við sér að nýju eftir snögga og djúpa niðursveiflu."