Stórleikur í Röstinni í kvöld

Tveir leikir fara fram í 8-liða úrslitum Powerade bikarsins í körfubolta í kvöld og þá ræðst hvernig raðast inn í undanúrslit keppninnar.

Grannliðin Grindavík og Njarðvík eigast við í Röstinni í Grindavík og þá taka Keflvíkingar má móti Þórsurum frá Akureyri. Báðir leikir hefjast klukkan 19:15.

Suðurnesjaliðin mæta nokkur breytt til leiks frá síðasta tímabili og því verður spennandi að sjá ný andlit í liðunum í kvöld.

Þeir Brenton Birmingham og Arnar Freyr Jónsson eru þannig gengnir til liðs við Grindavíkurliðið eftir að hafa verið hjá Njarðvík og Keflavík áður og þá hafa Njarðvíkingar fengið til sín þá Loga Gunnarsson sem kom úr atvinnumennsku og Magnús Gunnarsson frá Keflavík. Keflvíkingar eru svo komnir með Hörð Axel Vilbergsson lék með Njarðvík í fyrra.

KR og Snæfell hafa þegar tryggt sér sæti í undanúrslitum með sigrum á ÍR og Tindastól í gær.