Kvöld með eiginkonunni fyrir Celtics-miða

Fárið í kring um úrslitaeinvígið í NBA deildinni virðist nú komið á suðumark. Stuðningsmaður Boston liðsins hefur þannig boðið hverjum þeim sem útvegar honum aðgöngumiða á Boston-leik að eiga kvöld með eiginkonu sinni.

Þetta óvenjulega tilboð minnir um margt á kvikmyndina Indecent Proposal, þar sem maður leikinn af Robert Redford bauð hjónum (Woody Harrelson og Demi Moore) eina milljón dollara fyrir nótt með eiginkonunni.

Það skal tekið fram að eiginkona stuðningsmanns Celtics er til í að láta reyna á þetta óvenjulega fyrirkomulag ef það verður til þess að útvega bónda hennar miða.

Hjónin settu auglýsingu í einkamáladálk á netsíðu og segjast þau hafa fengið nokkur tilboð sem "virðast koma frá eðlilegu fólki"

Þess má geta að tilboðinu fylgir ekkert ósiðlegt, heldur er aðeins boðið upp á kvöldverð, drykk og félagsskap eiginkonunnar - sem lýst er sem dökkhærðri og fallegri konu í auglýsingunni.

"Ég hef verið stuðningsmaður Boston alveg síðan Larry Bird var að spila með liðinu og nú er ég kominn á fertugsaldurinn. Maður missir sig bara í spennunni yfir því að sjá liðið loksins vera komið í lokaúrslitin á ný. Það er ekki auðvelt fyrir venjulega menn að útvega sér miða á þessa leiki. Ég er bara venjulegur maður sem vill styðja sitt lið," sagði eiginmaðurinn.