Cassell er að reyna að fá sig lausan

Gamla brýnið Sam Cassell hjá LA Clippers er nú að reyna að fá sig lausan undan samningi og hefur hug á að ganga í raðir liðs sem á möguleika á að vinna meistaratitilinn í sumar.

Cassell er 38 ára gamall og er á síðasta ári sínu í samningi sínum við Clippers. Hann þarf líklega að sjá á eftir megninu af þeim rúmlega 360 milljónum króna sem hann á eftir af samningnum ef hann vill fá sig lausan.

Cassell viðurkenndi að viðræður væru í gangi milli forráðamanna Clippers og umboðsmanns síns þegar LA Times náði tali af honum í dag, en hann hefur mikið verið orðaður við Boston Celtics í allan vetur.

Clippers-menn reyndu að skipta Cassell í burtu áður en félagaskiptaglugginn lokaðist á dögunum en ekkert varð af því.

Boston gæti vel nýtt sér krafta Cassell sem er reyndur sigurvegari, en hann hefur átt í baráttu við meiðsli af og til í vetur. Vitað er að lið eins og Denver og Phoenix hafa líka áhuga á að nýta sér krafta Cassell, sem þarf að fá sig lausan fyrir laugardaginn ef hann ætlar sér að geta komist að hjá öðru liði í vetur.