Stoudamire ætlar að semja við San Antonio

Leikstjórnandinn Damon Stoudamire ætlar að semja við meistara San Antonio Spurs í þessari viku ef marka má ummæli umboðsmanns hans. Stoudamire hefur fengið sig lausan frá Memphis Grizzlies og er því frjálst að ræða við hvaða lið sem er í NBA deildinni.

Stoudamire, sem gengur undir gælunafninu Magni Mús, var mikið orðaður við Boston fyrst eftir að fréttist að Memphis ætlaði að kaupa hann út úr samningnum - en ekkert varð af því.

Fregnir herma að Boston ætli að bíða og sjá hvort það nær að næla í Sam Cassell hjá LA Clippers fyrir lokun félagaskiptagluggans í NBA í næsta mánuði - en hann hefur lýst því yfir að hann vilji komast til liðs sem á möugleika á að vinna titilinn.

Stoudamire er reyndur kappi og var kjörinn nýliði ársins þegar hann lék með Toronto árið 1996. Ef af þessu verður er ljóst að hann verður meisturum San Antonio mikill liðsstyrkur - ekki síst í ljósi þess að Tony Parker er meiddur og gæti misst úr næstu vikuna vegna meiðsla á hæl.

Stoudamire skoraði 7,3 stig og gaf 3,9 stoðsendingar á 20 mínútum í leik hjá Memphis í 29 fyrstu leikjunum, en hafði ekki komið við sögu í síðustu 14 leikjum liðsins. Hann er 34 ára gamall og og er í 22. sæti yfir þá sem skorað hafa flestar þriggja stiga körfur í sögu NBA.