NBA beitir sektum fyrir leikaraskap

Á fulltrúaþingi NBA deildarinnar í Orlando á dögunum var ákveðið að á næsta keppnistímabili verði leikmenn í deildinni sektaðir ef þeir gerast sekir um leikaraskap.

Leikrænir tilburðir, eða "flopping", hafa þótt færast í aukana í deildinni að undanförnu og þó þetta fyrirbæri hafi verið skrifað meira á útlenska leikmenn í deildinni, er það rétt að það er farið að hafa leiðindaáhrif á leikinn.

Forráðamenn deildarinnar hafa því ákveðið að bregðast við þessu fyrirbæri.

Ekki hefur verið gefið upp hvernig sektum og síðar jafnvel leikbönnum verður háttað, en tilvik sem þykja flokkast undir leikaraskap verða skráð sérstaklega og koma inn í skýrslur dómara eftir leiki.