Útlitið dökkt hjá Golden State

Þrír leikir fóru fram í NBA deildinni í körfubolta í nótt. Staða Golden State í baráttunni um sæti í úrslitakeppninni í Vesturdeildinni versnaði til muna þegar liðið tapaði 114-105 fyrir Denver á heimavelli.

Liðin tvö voru í harðri baráttu um áttunda og síðasta sætið í úrslitakeppninni en nú er svo komið að Denver hefur sætið alveg í hendi sér. Allen Iverson skoraði 33 stig fyrir Denver í leiknum í nótt og gaf 9 stoðsendingar, Carmelo Anthony skoraði 25 stig og hirti 9 fráköst og JR Smith skoraði 24 stig.

Monta Ellis skoraði 29 stig, hirti 8 fráköst og stal 5 boltum fyrir Golden State og Baron Davis var með þrefalda tvennu, 20 stig, 11 stoðsendingar og 10 fráköst. Al Harrington skoraði 20 stig og Stephen Jackson 18.

Denver tryggir sér sæti í úrslitakeppninni með því að vinna tvo af síðustu þremur leikjum sínum en Golden State þarf líklega að vinna þrjá síðustu leiki sína og vona að Denver tapi öllum sínum leikjum.

Golden State stefnir á að verða besta liðið til að komast ekki í úrslitakeppnina í sögu NBA, en það hefur þegar unnið 47 leiki.

Dallas í úrslitakeppnina

Dallas tryggði sér í nótt sæti í úrslitakeppninni með góðum heimasigri á Utah 97-94. Þetta var 50. sigur Dallas í vetur og er þetta áttunda tímabilið í röð sem Dallas vinnur 50 leiki eða meira í deildarkeppninni.

Dirk Nowitzki átti frábæran leik fyrir Dallas og tryggði liðinu sigur með þriggja stiga körfu þegar innan við sekúnda var eftir af leiknum. Skömmu áður hafði Deron Williams jafnað leikinn með ævintýralegri þriggja stiga körfu.

Nowitzki skoraði 32 stig í leiknum og Jason Terry skoraði 21 stig, en Mehmet Okur skoraði 19 stig og hirti 14 fráköst fyrir Utah og Deron Williams var með 18 stig og 12 stoðsendingar.

Auðvelt hjá Lakers

Loks vann Los Angeles Lakers auðveldan sigur á grönnum sínum í LA Clippers 106-78. Luke Walton var stigahæstur í jöfnu liði Lakers með 18 stig, Kobe Bryant skoraði 16 stig og Lamar Odom skoraði 14 stig og hirti 13 fráköst. Elton Brand skoraði 23 stig fyrir Clippers og Al Thornton skoraði 22 stig og hirti 10 fráköst.

Staðan í Austur- og Vesturdeild

Svona liti úrslitakeppnin út ef hún byrjaði í dag

NBA Bloggið á Vísi