Leikmenn fyrsta landsliðsins heiðursgestir

Sérstakir gestir KSÍ á landsleiknum við Slóvena á laugardaginn verða þeir leikmenn er skipuðu fyrsta landsliðshóp Íslands í knattspyrnu kvenna.

Fyrsti landsleikurinn var leikinn gegn Skotum ytra og fór fram í Kilmarnock 20. september 1981. Leiknum lauk með sigri Skota, 3-2, eftir að staðan í hálfleik hafði verið 1-0.

Íslenska liðið komst svo yfir í seinni hálfleik með mörkum frá Bryndísi Einarsdóttur og Ástu B. Gunnlaugsdóttur en heimamenn tryggðu sér sigur með tveimur mörkum undir lok leiksins.

Mikið vatn hefur runnið til sjávar síðan en til samanburðar má nefna að á þessu ári leikur íslenska kvennalandsliðið amk. 10 landsleiki en fyrstu fimm árin, frá 1981 - 1985, lék A landslið kvenna samtals níu landsleiki.

Leikur Íslands og Slóveníu á morgun hefst klukkan 14. Ísland er sem stendur í öðru sæti riðilsins, sex stigum á eftir efsta liðinu Frökkum en á tvo leiki til góða. Í þriðja sætinu koma svo Slóvenar sem með sigri á Laugardalsvellinum fara upp fyrir Íslendinga í annað sæti.

Það má því búast við hörkuleik þar sem bæði lið munu leika til sigurs. Slóvenar unnu fyrri leik þessara þjóða í riðlinum, 2-1 og eru það einu stigin er íslenska liðið hefur tapað í undankeppninni til þessa.

Efsta þjóð riðilsins tryggir sér sæti í úrslitakeppninni í Finnlandi, sem fram fer dagana 23. ágúst - 10. september 2009, en liðið sem hafnar í öðru sæti þarf að leika umspilsleiki um sæti í úrslitakeppninni.

Af vefsíðu KSÍ