Hamilton spáir háspennu í lokamótunum fjórum

Bretinn Lewis Hamilton spáir hörðum slag um meistaratitilinn í síðustu fjórum mótum ársins í Formúlu 1. Hann hefur þegar rölt brautina í Singapúr sem er ekin um helgina.

„Ég held að mótið verði mjög spennandi, jafnvel meira spennandi en nokkuð annað mót sem hefur farið fram á árinu. Það hefur enginn ekið í fljóðljósum áður og það gerir verkefnið spennandi og framandi.“

„Það er náttúrulega allt annað að labba og keyra brautina, en ég myndi segja að brautin sé blanda af Valencia og Mónakó. Svo erum við að keyra götur Sigapúr, fremur en hafnarsvæði. Svo finnst mér brautin þrengri en hinar brautirnar. Hún er bæði hröð og hæg.“

Aðeins eitt stig er á milli Hamilton og Felipe Massa í stigamótinu og hvert stig er því dýrmætt í þeim mótum sem eftir eru.

„Persónulega tel ég að Raikkönen, Kubica, Heidfeld og Kovalainen eigi möguleika á titilnum, rétt eins og við Massa. Það eru 40 stig í pottinum. En ég ætla ekki að keyra upp á örugg stig. Ég ætla byrja helgina á því að ná ná besta tíma í tímatökum,“ sagði Hamilton.

Sjá nánar á kappakstur.is.