McCann hjónin deila við portúgölsk yfirvöld

Kate og Gerry McCann gætu hætt við að snúa aftur til Portúgal til að hjálpa lögreglu við endurgerð atburðar kvöldið sem dóttir þeirra hvarf af sumarleyfisíbúð í Praia da Luz. Ástæðan er heiftarleg deila vegna skýrslutöku portúgölsku lögreglunnar sem lak í fjölmiðla.

McCann hjónin telja að skýrslunum sem þau gáfu lögreglumönnum klukkustundum eftir að dóttir þeirra hvarf 3. maí síðastliðinn hafi af ásettu ráði verið lekið til fjölmiðla af portúgölskum yfirvöldum.

Í þeim kemur meðal annars fram að Madeleine og Sean bróðir hennar hafi vaknað upp grátandi nóttina áður en stúlkan hvarf. Foreldrarnir hafi ekki heyrt í þeim þar sem þau hafi verið á nálægu veitingahúsi. Madeleine mun hafa spurt Kate næsta morgun: „Mamma af hverju komstu ekki þegar við vorum að gráta í gærkvöldi?"

Á fréttavef Sky segir að hjónin krefjist innri rannsóknar dómsmálaráðuneytisins í Portúgal á því hvort smáatriðum hafi verið komið til spænsks fréttamanns af ásettu ráði til að láta þau líta illa út daginn sem þau settu af stað herferð í Brussel fyrir nýju viðvörunarkerfi um Evrópu fyrir börn sem hafa týnst.

Þingmaður í heimabæ þeirra hefur heitið því að taka málið upp við utanríkisráðuneytið og talið er að lögmenn hjónanna í Portúgal muni mótmæla við yfirvöld þar.

Clarence Mitchell talsmaður McCann fjölskyldunnar hefur hvatt portúgölsku ríkisstjórnina að „ná taki" á lekanum.

Samstarfsvilji við portúgölsku lögregluna hefur dvínað varðandi endurgerð atburðanna vegna málsins.

Paulo Rebelo lögreglustjóri sem leiðir rannsóknina á málinu er farinn aftur til Portúgal frá Bretlandi, degi fyrr en áætlað var. Menn hans hafa verið í Bretlandi alla vikuna við spurningar á hinum svokallaða Tapas 7 hóp, sem samanstendur af vinum McCann hjónanna sem voru með þeim á Tapas bar kvöldið sem Madeleine hvarf.

Mitchell ítrekaði að hjónin vissu að þau hefðu gert mistök með því að skilja börnin sín þrjú eftirlitslaus eftir í íbúðinni þegar Madeleine var rænt, en lagði áherslu á eftirsjá þeirra yfir því að hafa gert það. Hann bætti ennfremur við að spurning Madeleine við morgunverðarborðið hefði verið meira í átt við eðlilegt tal en skömm.

„Þau gerðu mistök sem enginn, enginn, sér meira eftir en þau. Og mögulega þurfa þau að lifa með þeirri eftirsjá allt sitt líf," sagði Mitchell að lokum.