Ólík tríó í Ketilhúsi

Grímur Helgason klarinettuleikari, Guðrún Dalía Salómonsdóttir píanóleikari og Þórarinn Már Baldursson víóluleikari leika á hádegistónleikum Listasumars í Ketilhúsinu á Akureyri í dag kl. 12.

Þau flytja tvö afar ólík tríó fyrir klarinett, víólu og píanó; Tríó í Es-dúr „Kegelstatt“ KV 498 eftir W. A. Mozart og Märchenerzählungen op. 132 eftir R. Schumann.

Sagan segir að Mozart hafi samið Kegelstatt-tríóið á meðan hann spilaði keiluspil með félögum sínum. Það er uppfullt af undurfögrum laglínum og leikandi gáskafullum stefjum. Víólan er í óvenjustóru hlutverki, enda uppáhalds strengjahljóðfæri Mozarts.

Schumann samdi Märchenerzählungen árið 1854, eða tveimur árum fyrir andlát sitt. Það er fremur létt yfir tríóinu, jafnvel þótt Schumann hafi reynt að drekkja sér í ánni Rín viku eftir að hann skilaði því til útgefanda.

Grímur Helgason útskrifaðist frá Listaháskóla Íslands vorið 2007 og stundar nú nám við Conservatorium van Amsterdam; kennari hans þar er Hans Colbers. Grímur hefur á undanförnum árum leikið með margs konar tónlistarhópum. Má þar nefna Kammersveitina Ísafold, Sinfóníuhljómsveit Norðurlands, Njúton, Djangódjass-sveitina Hrafnaspark og Hjaltalín.

Guðrún Dalía Salómonsdóttir útskrifaðist frá Tónlistarháskólanum í Stuttgart sumarið 2007 og stundar nú framhaldsnám í París. Guðrún Dalía hefur haldið fjölda tónleika á Íslandi og í Þýskalandi bæði sem einleikari og meðleikari. Þórarinn Már Baldursson stundaði framhaldsnám í Stuttgart og er fastráðinn víóluleikari við Sinfóníuhljómsveit Íslands.

Þórarinn er meðlimur í Kammersveitinni Ísafold og Tríó Artis. Hann hefur einnig leikið með ýmsum samspilshópum, til að mynda Hljómsveit Íslensku óperunnar og Kammersveit Reykjavíkur.

- vþ