700 milljóna sátt hjá New York

Sátt hefur náðst í máli fyrrum starfsmanns NBA félagsins New York Knicks á hendur forráðamanna félagsins og Isiah Thomas vegna meintrar kynferðislegrar áreitni þjálfarans. Anucha Sanders, fyrrum yfirmaður hjá félaginu, fær ríflega 700 milljónir króna út úr sáttinni.

Mál þetta hefur sett svartan blett á félagið og hefur dregist mikið á langinn - svo lengi að David Stern, forseti NBA, beitti þrýstingi forráðamenn Knicks þrýstingi um að reyna að ná tafarlausum sáttum í málinu til að koma því úr sögunni.

"Ég er mjög ánægð með að sátt hafi náðst í málinu og kviðdómurinn hefur með þessari niðurstöðu sent út öflug skilaboð um að kynferðisleg áreitni verði ekki liðin í Madison Square Garden. Þetta hefur verið langt og erfitt ferli en réttlætinu hefur verið fullnægt," sagði Sanders í yfirlýsingu en hún kærði Isiah Thomas þjálfara Knicks fyrir kynferðislega áreitni.

Réttarhöld í máliu höfðu staðið yfir í tvo mánuði og áttu að halda áfram í næsta mánuði, en þar hefði Knicks hugsanlega geta staðið frammi fyrir miklu hærri fjárútlátum en raun ber vitni. Því má líklega segja að allir græði á niðurstöðunni nú. Sanders fær bætur sínar strax, Knicks losnar við að greiða hærri skaðabætur og þá er þetta ljóta mál úr sögunni.

Forráðamenn Knicks voru þó alls ekki sáttir við niðurstöðuna. "Ég hef sagt það áður og held því enn fram að ég er saklaus. Þessi niðustaða breytir því ekki. Þetta er hinsvegar það sem er best fyrir Madison Square Garden og því fellst ég á þessa niðurstöðu," sagði Thomas.

Talsmaður félagsins var ekki sáttari og sagði þrýsting frá forráðamönnum NBA hafa verið einu ástæðuna fyrir því að ákveðið hafi verið að semja nú.

Þar með virðist þessu ljóta máli vera lokið og því geta Thomas og félagar farið að einbeita sér að fullu að því að rétta við skelfilegt gengi New York í deildarkeppninni.