Shaq er orðinn reiður

Miðherjinn Shaquille O´Neal er orðinn hundleiður á því að vera kallaður of gamall og lét blaðamenn heyra það eftir enn eitt tap Miami Heat í nótt. Hann segir slaka tölfræði sína að hluta til félögum sínum í liðinu að kenna.

"Þið getið skammað mig fyrir að vera of gamall ef ég er að taka 20 skot í leik og nýta aðeins tvö þeirra, en í dag er ég að hitta úr 60-65% skota minna. Ég held að félagar mínir ættu bara að vera duglegri við að koma boltanum á mig - þetta er svo einfalt," sagði hinn 35 ára gamli O´Neal.

Hann er að skora aðeins um 15 stig og hirða 7 fráköst á aðeins 28 spiluðum mínútum í leik í vetur sem er langslakasta tölfræði miðherjans á ferlinum. Shaq var spurður að því hvort hann hefði komið þessum skilaboðum áleiðis til þjálfara síns. "Af hverju í ands**tanum ætti ég að þurfa að gera það?" þrumaði tröllið.