Konur streyma í kynlífsferðir til Kenya

Fullorðnar hvítar konur streyma nú í kynlífsferðir til Kenya, þar sem þær finna sér stæðilega unga karlmenn til þess að deila fríinu með.

Fréttamaður Reuters segir frá tveim breskum konum sem hann hitti í Mombasa. Bethan sem er 56 ára og Allie sem er 64 ára gömul. Þær eru vinkonur og búa við sömu götu í Suður-Englandi.

Á bar í höfuðborginni hallaði Allie hvíthærðum kollinum að öxl fylgisveins síns. Sá var vel yfir sex fet á hæð, 23 ára gamall og tilheyrði Masai ættbálknum.

Hann var með ný sólgleraugu sem hann sagði að hún hefði gefið honum. "Við fáum bæði það sem við viljum. Hvað er neikvætt við það," spurði Allie.

Bethan fylgdist með sínum tvítuga pilti sem var að spila billiard. Hann kom til hennar og kyssti hana. Og fékk meiri smápeninga til þess að halda áfram að spila.

Reuters segir að erfitt sé að nefna tölur í þessu sambandi. Innfæddir giska á að ein af hverjum fimm hvítum konum sem koma einar til landsins séu í leit að fylgdarsveinum.

Julia Davidson við háskólann í Nottingham hefur skrifað um kynlífsferðir vesturlandabúa til fátækari landa. Hún segir að rannsóknir hennar hafi leitt í ljós að margar kvennanna sem fara til Afríku vilja ekki nota smokka í samskiptum sínum við þarlenda.

Það sé töluverð áhætta í Afríku, en konunum finnist þeir ekki passa inn í kynlífsdrauma sína.