Ég er ekki barnaníðingur

Kanadamaðurinn Christopher Neil segist saklaus af því að hafa níðst á börnum. Neil var handtekinn í Tælandi síðastliðinn föstudag. Þangað hafði hann farið frá Kóreu þar sem hann var enskukennari. Þá hafði alþjóðalögreglan Interpol lýst eftir honum og fengið hundruð ábendinga.

Lögreglan telur víst að Christopher Neil sé maðurinn sem setti meira en 200 myndir af sér á netið, þar sem hann var að nauðga ungum drengjum. Hann hafði falið andlit sitt með sérstakri tækni en sérfræðingum þýsku lögreglunnar tókst að draga það fram með því að nota sömu tækni.

Yfirmaður í Tælensku lögreglunni segir að Neil hafi lýst yfir sakleysi sínu, en lítið sagt annað. Við fréttamann sem náði að hrópa til hans spurningu sagðist hann biðja fjölskyldu sína að hjálpa sér til að losna úr fangelsi.