Keflavík lagði Snæfell í æsilegum leik

Iceland Express deild karla hefur farið mjög vel af stað og á því varð engin breyting í kvöld þegar Keflvíkingar unnu sigur á Snæfelli 113-109 eftir æsilegan og framlengdan leik í Stykkishólmi.

Leikurinn var sveiflukenndur og í hálfleik höfðu Keflvíkingar yfir 69-48, hreint ótrúlegar tölur. Heimamenn voru hinsvegar ekki dauðir úr öllum æðum og náðu að komast inn í leikinn. Aðeins eitt stig skildi liðin að eftir þrjá leikhluta og að lokum varð að framlengja eftir að staðan hafði verið jöfn 99-99. Það voru svo gestirnir sem höfðu betur í lokin og hafa því unnið báða leiki sína til þessa - gegn Grindavík og Snæfelli - og því er greinilegt að liðið ætlar lítið að láta hrakspár manna í haust hafa áhrif á sig.