Brann lifandi með fjórum börnum sínum

Tugir manna hafa farist í skógareldunum í Grikklandi og margir eiga um sárt að binda. Sérstaklega þykir þó sorgleg saga 37 ára gamallar móður sem reyndi að flýja eldana ásamt fjórum börnum sínum. Hún átti heima í Aþenu en var í heimsókn hjá móður sinni í smáþorpinu Artemida sem er um 330 kílómetra suðvestur af höfuðborginni.

Börn Athanasiu Paraskevapoulo voru á aldrinum fimm til fimmtán ára. Þegar eldarnir voru við það að umkringja Artemida þurfti Athanasia eins og þorpsbúar eitthundrað að ákveða hvort þeir skyldu reyna að flýja, eða halda kyrru fyrir og vona að eldarnir næðu ekki að húsi móður hennar.

En eldarnir nálguðust bæinn hratt og skelfing greip um sig þegar fréttist að slökkviliðssveitir kæmust ekki til þeirra. Fjölmargir ákváðu þá að reyna að forða sér upp á eigin spýtur og bílalest lagði af stað úr bænum. Athanasia og börn hennar voru þar á meðal.

Þegar kom að krossgötum varð fólkið að ákveða hvort það héldi áfram niður til nágrannabæjarins Zahora eða héldi upp fjallið. Það ákvað að fara niðureftir. Vegna reyks var skyggni lítið sem ekkert og þegar bílalestin var komin nokkra kílómetra niðureftir fjallinu lentu fremstu bílarnir í hörðum árekstri við slökkviliðsbíl sem var á leið til Artemida.

Við áreksturinn valt slökkviliðsbíllinn þvert yfir veginn og lokaði honum. Fólkið átti þá ekki annarra úrkosta að flýja upp fjallið með eldana á eftir sér. Meðal fólksins var Athanasia. Hún komst ekki hratt yfir með börnin sín fjögur. Á laugardagsmorgun fundust kolbrunnin lík hennar og barnanna yst á bjargbrún. Börnin voru í faðmi móður sinnar. Alls fórust 24 þorpsbúar en þorpið þeirra slapp við eldana.