Bæjarstjóri vísar því á bug að minnihlutinn hafi ekki fengið að leggja fram bókanir

Gísli S. Einarsson, bæjarstjóri á Akranesi, vísar því til föðurhúsanna að minnihluti bæjarstjórnar hafi ekki fengið að bóka sitt álit á samkomulagi bæjarstjórnar við Kalmansvík ehf. Samkomulagið gefur Kalmansvík ehf. heimild til að útfæra allt að sjö hektara land við Kalmansvík þar sem fyrirhugað er að reisa allt að 450 íbúðir fyrir 50 ára og eldri. Fulltrúar minnihlutans í bæjarstjórn halda því fram að á aukafundi í bæjarstjórn sem haldinn var á laugardaginn hafi þeim verið meinað að leggja fram bókanir vegna málsins.

Í fréttatilkynningu frá meirihluta bæjarstjórnarnar á Akranesi segir að bæjarráð Akraness hafi samþykkt eftirfarandi bókun 7. desember 2006.

"Bæjarráð heimilar Soffíu (Kalmansvík ehf) að útfæra skipulag á allt að 7 ha. landi við Kalmansvík enda skili hún tillögu um skipulag á svæðinu og framkvæmdaáætlun innan eins árs. Bæjarráð mun ekki úthluta umræddu landi á þeim tíma."

Þessi bókun var samþykkt samhljóða í bæjarráði 7. desember 2006 og í bæjarstjórn 12. desember 2006 af öllum bæjarfulltrúum. Í bæjarráði 24. maí var bæjarstjóra og bæjarritara falið að gera drög að samningi við Kalmansvík ehf. Sú samþykkt var svo staðfest í bæjarstjórn 12. júní 2007.

"Að framansögðu má ráða að bæjarstjórn Akraness stóð öll að þessu máli og er það upphlaup sem varð 17. júlí með öllu óskiljanlegt," segir í tilkynningu. Ennfremur segir að allt tal minnihlutans í bæjarstjórn, um að hafa ekki fengið að bóka sitt álit á samningnum, sé vísað til föðurhúsanna þar sem bæjarfulltrúar minnihlutans tóku fjórtán sinnum til máls án þess að taka fram að um bókun gæti verið að ræða og af þeim sökum sleit forseti bæjarstjórnar dagskrá að henni tæmdri.

Að lokum segir að öll gögn Akraneskaupstaðar séu aðgengileg fyrir kjörna fulltrúa í bæjarstjórn Akraness.