Garðsláttur í bikini

Umsvifin hjá litlu garðsláttufyrirtæki í Memphis í Tennessee hafa margfaldast eftir að það byrjaði að senda bikini klæddar stúlkur til þess að slá garðana hjá fólki. Karlmenn sem áratugum saman hafa slegið garða sína sjálfir eru allt í einu búnir að fá í bakið, og þurfa nauðsynlega að fá aðra til þess að slá fyrir sig.

Stúlkurnar eru einnig ánægðar með þetta fyrirkomulag. Þær segja að þetta sé verk sem þarf hvort eð er að vinna. Og þær eru yfir sig hrifnar af því að fá að vera í bikini, því þá verða þær svo jafnt og fallega sólbrúnar. Garðsláttufyrirtækið íhugar nú að fylgja þessu eftir með því að bjóða upp á bikini klæddar stúlkur til þess að tína upp laufið á haustin.