Blóðbað í Rauðu moskunni

Pakistanski herinn gerði áhlaup á Rauðu moskuna í Islamabad, höfuðborg landsins, á miðnætti í gærkvöldi eftir að samningaviðræður við vígamenn báru ekki árangur. Tæplega 60 vígamenn hafa látið lífið og um átta hermenn. Þá hafa 29 hermenn særst í átökunum.

Herinn hefur nú náð rúmlega tveimur þriðju hluta svæðisins á sitt vald. Hann hefur náð moskunni sjálfri undir sína stjórn en er ennþá að berjast við vígamenn í kjallara bænaskólans. Þeir hafa þegar tryggt hluta kjallara skólans og hafa náð að frelsa um 50 konur og börn.

Talsmaður hersins, Waheed Arshad, sagði að nú væri barist herbergi fyrir herbergi í hörðum bardögum. Herinn tilkynnti komu sína og gæfi vígamönnum 15 mínútur til þess að gefast upp og yfirgefa herbergið. Eftir það væri ráðist inn í herbergin.

Talið er að vígamennirnir ætli sér að verjast í kjallaranum til síðasta manns. Enn hefur lítið sem ekkert sést til þeirra hundruð kvenna og barna sem enn eiga að vera inni í moskunni en 20 börn sluppu úr henni þegar áhlaupið hófst.

Háttsettur maður innan hersins sagði fyrr í morgun að klerkurinn Abdul Rashid Ghazi hefði verið handtekinn. Hann er æðsti trúarleiðtoginn sem enn er inni í moskunni. Nú er hins vegar talið að hann hafi, ásamt vígamönnunum, lokað sig inni í einu af herbergjunum í kjallara skólans. Þar séu síðan fjöldi kvenna og barna sem þeir ætli sér að nota sem mannlega skildi.

Yfirvöld fullyrða að fjölmörgum nemendum bænaskólans hafi verið skipað að vera áfram, þvert gegn vilja sínum. Þau telja að á bilinu 200 til 500 nemendur séu þar enn inni, fyrir utan vígamennina. Moskan var lengi þyrnir í augum yfirvalda en þau afhöfðust ekkert af ótta við hefndaraðgerðir herskárra múslima í norðvesturhluta landsins. Að minnsta kosti einn slíkur hótaði í gær hefndum ef ráðist yrði á moskuna.

Smellið hér til þess að sjá myndir þaðan.