Bandarískur yfirdómari herdómstóls í Gvantanamo fangabúðunum á Kúbu, hefur vísað frá öllum ákærum á hendur ungum Kanadamanni. Dómarinn sagði að Kanadamaðurinn, Omar Khadr félli ekki undir hans lögsögu.
Árið 2006 voru sett ný lög í Bandaríkjunum sem heimila að réttað sé yfir meintum erlendum hryðjuverkamönnum í Gvantanamo.
Dómarinn sagði að Omar Khadr félli ekki undir skilgreiningu hinna nýju laga. Óljóst er hvort Khadr verður sleppt úr haldi eða hvort hann verður ákærður á nýjan leik.
Í bandarískum lögum sem ná til almennra ríkisborgara er ekki hægt að rétta tvisvar yfir manni fyrir sama brot. Herdómstólar eru hinsvegar um margt öðruvísi en almennir dómstólar.
