Hvað er hægt að leggjast lágt ?

Breskir lögreglumenn eru öskureiðir út í innbrotsþjóf sem stal trúlofunarhring af hendi 103 ára gamallar konu. Þeir kalla framferði hans fyrirlitlegan heigulshátt. Þeir vona að jafnvel glæpalýð landsins þyki þarna of langt gengið, og komi kauða undir manna hendur.

Florence Hayes, sem býr í Manchester, hafði gengið með trúlofunarhringinn á fingri sér í fimmtíu og sjö ár. Innbrotsþjófurinn braust inn til hennar snemma á laugardagsmorgun. Hann heimtaði af henni peninga og skartgripi. Og reif hringinn af henni áður en hann fór.