Hæsti­réttur stað­festi dóm héraðs­dóms yfir Jónasi

Hæstiréttur staðfesti í dag þriggja ára fangelsisdóm Héraðsdóms Reykjavíkur yfir Jónasi Garðarssyni, fyrrverandi formanni Sjómannafélags Reykjavíkur, fyrir manndráp af gáleysi.

Hann var ákærður fyrir að hafa verið valdur að dauða tveggja manna eftir að skemmtibátur hans, Harpan, steytti á Skarfaskeri á Faxaflóa haustið 2005.

Jónas hélt því fram við aðalmeðferð málsins fyrir Héraðsdómi Reykjavíkur að hann hefði ekki verið við stýrið þegar slysið varð heldur Matthildur Harðardóttir. Matthildur og sambýlismaður hennar, Friðrik Ásgeir Hermannsson, létust í slysinu en Jónas, kona hans og sonur komust lífs af.

Lögmaður Jónasar lagði fram matsgerð tveggja lækna fyrir Hæstarétt sem töldu að Jónas hefði verið ófær um að hugsa rökrétt eftir slysið vegna höfuðhöggs sem hann fékk. Dómurinn segir hins vegar að matsmennirnir hafi ekki getað stutt niðurstöðu sína við rannsóknir á Jónasi enda hafi þeim verið falið að meta mjög skammvinnt tímabundið andlegt ástand eftir slysið sem varð hálfu öðru ári áður en matið fór fram. Það rýri matsgerðina og því hafi ekki verið hægt að draga þá ályktun að Jónas hafi verið alls ófær um að stjórna gerðum sínum eftir slysið.

Jónas var dæmdur í þriggja ára fangelsi í héraðsdómi vegna málsins en það er einn þyngsti dómur sem fallið hefur hér á landi fyrir manndráp af gáleysi. Jónas krafðist sýknu í málinu en ákæruvaldið fór fram á þyngri dóm yfir Jónasi en þeim sem hann fékk í héraðsdómi.

Þá var Jónas jafnframt dæmdur til að greiða aðstandendum þeirra sem létust í slysinu 9,6 milljónir króna.

Jónas var ekki viðstaddur dómsuppkvaðningu í Hæstarétti í dag.