Líkamsmeiðingum fjölgar um helming

Fjöldi líkamsmeiðinga sem tilkynntar voru til lögreglu í mars fjölgaði um 50 prósent miðað við marsmánuð á síðasta ári. Ölvunarakstursbrot jukust um rúmlega 40 prósent. Þá hefur tíðni fíkniefnabrota stigvaxið í mánuðinum frá árinu 2003, en flest þeirra eru framin frá miðnætti til klukkan sex að morgni. Þetta kemur fram í nýrri samantekt lögreglunnar um fjölda afbrota í marsmánuði síðastliðin ár.

Flest þjófnaðarmál og innbrot voru framin á miðvikudögum og sunnudögum í mars. En á venjulegum laugardegi voru að meðaltali framin 10 fíkniefnabrot, 14 eignaspjöll og 12 ölvunarakstursbrot. Flestar líkamsmeiðingar áttu sér hins vegar stað á sunnudegi.

Tíðni umferðar- og hegningarlagabrota er hæst frá hádegi til klukkan sex að kvöldi.

Innbrotum og þjófnaðarmálum fjölgaði sem og áfengis- og ölvunarakstursbrotum sem jukust um rúmlega 40 prósent frá fyrra ári.

Hegningarlagabrot í síðasta mánuði voru 1.087 og er það aukning frá síðasta ári. Á sama tíma og fíkniefnabrotum fjölgar jafnt og þétt er meiri sveifla á tölum um hegningar- og umferðarlagabrot á milli ára.