Jarðskjálftahrina nærri Eldey

Vel á annað hundrað nokkuð snarpra jarðskjálfta mældust nærri Eldey á Reykjaneshrygg í nótt og í morgun. Skjálftahrinunni er lokið en hún stóð óvenju lengi.

Upptök skjálftanna voru um 35 kílómetra suðvestur af Reykjanesvita, nánar tiltekið við Geirfugladranga sem er nærri Eldey. Stærstu skjálftarnir mældust nærri fjórum á Richter og fjölmargir á milli þrír og þrír og hálfur á ricther.

Að sögn Matthew J. Roberts jarðskjálftafræðings hjá Veðurstofu Íslands virðist nú sem hrinunni hafi slotað um hálf tíu leytið í morgun en þá höfðu mælst um 150 skjálftar síðan hrinan hófst um hálf tíu í gærkvöldi.

Matthew segir að skjálftar séu algengir á þessum slóðum en hinsvegar sé óvenjulegra að hrinur sem þessar standi svona lengi. Hann segir ekkert benda til þess að búast megi við meiri virkni, hvað þá eldgosum.