Njarðvíkingar mæta KR í úrslitum

Það verða Njarðvík og KR sem leika til úrslita í Iceland Express deild karla í körfubolta. Njarðvíkingar unnu í dag sannfærandi sigur á grönnum sínum í Grindavík 93-70 í oddaleik liðanna í Njarðvík.

Njarðvík var yfir allan leikinn í kvöld og leiddi 45-36 í hálfleik. Heimamenn náðu góðu forskoti í þriðja leikhluta, en gestirnir náðu að minnka muninn niður í 2 stig undir lok leikhlutans. Njarðvíkingar tóku svo öll völd á vellinum í fjórða leikhlutanum og sigldu yfir Grindvíkinga.

Jeb Ivey skoraði 20 stig fyrir Njarðvík, Igor Beljanski 18 og þeir Jóhann Ólafsson, Egill Jónasson og Brenton Birmingham skoruðu 10 stig hver.

Adam Darboe skoraði 20 stig fyrir Grindavík, Jonathan Griffin 19, Þorleifur Ólafsson 16 og Páll Kristinsson 11. Páll Axel Vilbergsson skoraði aðeins 2 stig í leiknum og munar sannarlega um minna fyrir Grindvíkinga.