Denver valtaði yfir Phoenix

Nokkur óvænt úrslit urðu í NBA deildinni í körfubolta í nótt. Denver rótburstaði Phoenix, Boston hélt upp á dag heilags Patreks með fyrsta sigri sínum í San Antonio í 18 ár og Chicago tapaði fyrir Memphis. Þá vann Cleveland 8. leikinn í röð og Indiana afstýrði vafasömu meti þegar liðið vann sinn fyrsta sigur í 12 leikjum.

Denver fór hamförum gegn Phoenix og sigraði 131-103. Allen Iverson skoraði 44 stig og gaf 15 stoðsendingar fyrir Denver og Carmelo Anthony skoraði 29 stig. Leandro Barbosa skoraði 25 stig fyrir Phoenix og Steve Nash skoraði 15 stig og gaf 10 stoðsendingar. Phoenix hefur nú tapað tveimur leikjum í röð - með samtals 46 stigum - síðan liðið vann frækinn sigur á Dallas í tvíframlengdum leik í vikunni. Denver vann fjórða leikinn í röð og er nú að fara á erfiða keppnisferð.

San Antonio tapaði fyrir Boston á heimavelli í fyrsta skipti í 18 ár þegar liðið lá 91-85 fyrir þeim grænklæddu. Paul Pierce skoraði 30 stig fyrir Boston og Tony Parker sömuleiðis fyrir San Antonio.

Cleveland vann áttunda leikinn í röð þegar það skellti Utah á heimavelli 82-73. Þetta var fjórða tap Utah á fimm dögum á keppnisferð um austurströndina. Carlos Boozer lék sinn fyrsta leik í Cleveland síðan hann fór frá liðinu árið 2004 og skoraði 19 stig og hirti 14 fráköst, En LeBron James skoraði 24 stig, hirti 17 fráköst og gaf 9 stoðsendingar hjá Cleveland.

Chicago tapaði fyrir Memphis 104-103. Ben Gordon skoraði 33 stig fyrir Chicago en Mike MIller skoraði 25 stig og hirti 12 fráköst fyrir Memphis - sem vann aðeins 17. leik sinn í vetur.

Indiana afstýrði 12. tapinu í röð með sigri á Atlanta á heimavelli 113-90, en tap hefði þýtt vafasamt félagsmet. Troy Murphy skoraði 22 stig fyrir Indiana.

Sacramento stöðvaði taphrinu sína með sigri í Orlando 95-83. Kevin Martin skoraði 20 stig fyrir Sacramento en Jameer Nelson skoraði 23 stig fyrir Orlando.

Washington skaut New Orleans í kaf 125-103 þar sem Gilbert Arenas skoraði 30 stig og setti niður tvær fjögurra stiga sóknir í leiknum þegar brotið var á honum í þriggja stiga skoti -sem hann setti niður. Chris Paul skoraði 21 stig fyrir New Orleans.

Loks vann Golden State nauman sigur á Seattle á útivelli 99-98 í æsispennandi leik á NBA TV þar sem Baron Davis skoraði sigurkörfu Golden State skömmu fyrir leikslok. Jason Richardson skoraði 23 stig fyrir Golden State og Ray Allen setti 25 stig fyrir Seattle og Rashard Lewis 23 stig.