Kobe Bryant skoraði 65 stig

Kobe Bryant var ekki á þeim buxunum að tapa áttunda leiknum í röð með liði sínu LA Lakers þegar það mætti Portlant í NBA deildinni í nótt. Lakers hafði betur 116-111 eftir framlengdan leik, þar sem Kobe Bryant skoraði 65 stig fyrir Lakers.

Sjö leikja taphrina Lakers liðsins var sú lengsta sem Phil Jackson þjálfari hafði þurft að þola á löngum ferli sínum sem þjálfari, en Kobe Bryant sá til þess að töpin yrðu ekki fleiri. Hann skoraði 24 stig í fjórða leikhlutanum og 9 stig í framlengingunni. Þetta var í þriðja skiptið á ferlinum sem Kobe Bryant skorar 60 stig eða meira í einum leik.

Detroit Pistons vann mjög sannfærandi útisigur á Phoenix 105-83 og færði Phoenix næst stærsta tap sitt í vetur. Þetta var fimmti sigur Detroit á fimm leikja ferðalagi liðsins um Vesturdeildina. Ron Murray átti sinn besta leik í vetur með 25 stig hjá Detroit og Rasheed Wallace skoraði 20 stig. Amare Stoudemire skoraði 24 stig og hirti 15 fráköst fyrir Phoenix og Steve Nash skoraði 20 stig.

Dallas afstýrði naumlega þriðja tapinu í röð þegar liðið lagði Boston 106-101 á heimavelli. Josh Howard og Dirk Nowitzki skoruðu 30 stig fyrir Dallas en Paul Pierce skoraði 29 stig fyrir Boston.

Miami vann 9. leikinn í röð með sigri á Sacramento 103-97 á heimavelli. Shaquille O´Neal skoraði 23 stig fyrir Miami en Ron Artest skoraði 32 stig fyrir Sacramento.

Philadelphia færði Utah þriðja tapið í röð á útivelli með 89-88 sigri. Andre Iguodala skoraði 23 stig fyrir Philadelphia en Deron Williams var með 18 stig og 16 stoðsendingar hjá Utah.

Houston burstaði Toronto 114-100 á útivelli. Tracy McGrady skoraði 24 stig fyrir Houston en TJ Ford skoraði 18 stig fyrir Toronto.

LA Clippers lagði Charlotte 102-93 á útivelli eftir fimm töp í röð. Tim Thomas skoraði 24 stig fyrir Clippers en Raymond Felton 18 fyrir Charlotte.

New Orleans lagði New York 92-90 á útivelli. Chris Paul skoraði 20 stig fyrir New Orleans en Steve Francis 21 fyrir heimamenn.

Loks vann Golden State öruggan sigur á Minnesota á heimavelli 106-86 þar sem Monta Ellis skoraði 24 stig fyrir Golden State en Randy Foye setti 20 fyrir Minnesota.