Írak vill afnema dauðarefsingu

Ríkisstjórn Íraks, sem hlaut mikla gagnrýni fyrir hvernig staðið var að aftöku Saddams Hussein, vill afnema dauðarefsingu, að sögn mannréttindaráðherra landsins. Wijdan Michael segir að það verði gert í áföngum. Fyrsta skrefið verði að afnema dauðarefsingar fyrir brot önnur en þau allra verstu, svosem þjóðarmorð og glæpi gegn mannkyninu.

Sameinuðu þjóðirnar eru andvígar dauðarefsingum, en þær viðgangast engu að síður í næstum 70 ríkjum. Dauðarefsingum var iðulega beitt í stjórnartíð Saddams Hussein, en þeim var hætt eftir fall hans. Þær voru teknar upp aftur fyrir tveim árum vegna tíðra mannskæðra hryðjuverka.